【大祠堂 小魚兒】(一)

【大祠堂 小魚兒】是一位在囚人士精心編寫的新專欄。監獄裡重門深鎖、守衛深嚴的，究竟是怎樣？在囚人士日常生活又是怎樣？有甚麼趣聞、秘聞？讓小魚兒在大祠堂裡為我們一一解答......

大祠堂 小魚兒 #001

第一次同各位相聚，本來應該講吓我背景比大家聽的，但因某些原因，不便公開，望原諒。但可以講吓我生活比大家知啊！

其實現今嘅監獄，係非常之好嘅，唔會好似電影中描述得咁得人驚嘅！阿SIR對我地都好好，賞罰分明。亦待我哋好似朋友咁，我哋有問題或情緒上困擾，都會耐心解答同開解我地嘅！

衣、食、住、行都好好。衣服冬暖夏涼，食就多菜少肉少油，好健康。住嘅房間尚算OK，有廁所程洗手盤。唔似以前咁，每日返房都要攞一個黃桶、一個紅桶返房。黃桶開小，紅桶開大。每朝都要排隊去倒夜香。>_<

至於行方面亦照顧得我哋好好，每日有一個鐘比我哋做運動，有足球、排球、籃球、乒乓球等運動設施比我哋享用。本來熱愛足球嘅我，喺上年生日前一日斬柴吖！唔係，係抝柴>_<，直到而家都唔敢踢波喇！咁咪試下跑步囉！以前我係10個圈都跑唔到架！但經教練阿SIR鼓勵下，我而家可以跑到60個圈喇！

坐監生活沉悶就一定架喇！但都可以苦中作樂嘅！沖涼時整蠱吓人咁囉！冬天襯個FD沖涼就淋佢冰水，然後成班衝番出去，每人裝一嘜冰水淋佢，要襯佢洗頭時睇唔到嘢先淋，非常邪惡>v<，比人淋果個咪响沖涼房大聲爆粗X+Y+Z，我哋咪笑到轆地囉！又玩車褲腳囉！冬天襯人沖涼除咗條長褲掛响鈎度，我哋鬼鼠偷咗佢條長褲，將褲腳車埋佢，等佢沖完涼，穿條褲時，就會成個人跌低，我哋又笑到肚痛囉！^v^超搞笑，但大家FD，唔會發爛渣嘅！仲可以培養出友誼添！

但呢度亦係一個社會縮影，乜嘢人都有。响呢度除咗夜晚返房，每日12小時對住，邊個係人、邊個係鬼，好快就知。所以响度做人處事一定要好小心。

我响度生活係好平凡的，開工、放工、返房睇書、寫信、聽收音機……十點瞓，六點半起身。唔會參加任何比賽同有競爭嘅遊戲。因為啲人好計較輸贏，就會產生怨恨、埋怨嘅心，我唔鐘意呢種感覺。往往佢哋就係為咗咁而嗌交，等佢哋冷靜後，我就會同佢哋講「你人生最大一場賭注，你單官司呀！都已經輸咗，入咗嚟啦！仲咁計較輸贏做乜？」係朋友我先同佢講嘅！我享受一個人生活，最自在就係返到自已房間，做乜都得，好Feel。

現在嘅我，只想平平靜靜，盡量開開心心咁過每一日，等待出獄與大家見面。我時常提醒自已，我已唔開心咗咁多年，夠喇！出去後我要每日都過得開心，我仲有幾十年要過，我要用每日開心去賺番以往咁多年唔開心嘅日子返嚟。呢盤生意賺硬嘅！各位有冇興趣入股呀？>v<

好喇！夜喇！今晚傾住咁多先啦！下次再講啦！有乜嘢想知，可以問我喎！後會有期，再見！