【大祠堂 小魚兒】(二)

今日想講吓小魚兒响大祠堂見到嘅千奇百怪事同魚嘅品種。首先講品種先吖！有非洲、印度、巴基斯坦、日本、台灣等等。而家最多係非洲品種。佢地態度比較差、冇胆、貪小便宜。但佢哋真係好慳，我哋每月六百幾蚊人工，佢哋真係乜都唔買，儲住啲錢留番出去攞返非洲。六百蚊响非洲可以用一年架喇！所以佢哋比人鬧都唔會郁手，因一比人鎖，就會扣人工同埋重新上過人工，要幾個月先上番六百蚊人工。但諗深一層，又唔可以怪曬佢哋，佢哋窮、冇書讀、冇受過教育，又好難怪佢哋。

我喱度平均有三分二人喺終身犯，大多數係一時衝動為情、為錢而犯下殺人罪。大多數坐25-26年就出去。最重喺姦殺同殺警察，大約坐30年，情殺最輕，大約23-24年。

喱度阿Sir對我哋都非常好，我哋有嘢唔開心，家裡有事發生，都會開解我哋，當係朋友咁。每朝開房門都叫我哋早晨，晚上鎖門都會同我哋講聲晚安。我哋亦會同阿Sir講早晨、晚安。大家互相尊重，唔會好似戲人面咁呼呼喝喝。總之阿Sir能力範圍幫到就一定會幫。

有時我哋大家少不免都會嗌交，阿Sir都會苦口婆心為我哋調停，盡量都會比機會我哋，唔會郁啲就罰。但勸唔聽就無辦法。我哋喱度嘅人全部都坐到18年以上，已經人咗大直路。所以大多數都好識諗，有邊個唔想盡早返出社會吖！

我喱度有小食買，我每用會整兩次滾水蒸飯食，我會買一包牛肉粒，一包尤魚絲，一句豬肉乾，一包齋燒鵝，將佢哋全部整碎，然後留一碟飯，將以上材料倒落飯度撈埋，再放入飯兜，將蓋蓋好，再用桶裝半桶滾水，將飯兜放入桶，來回換滾水3次，到夜晚就有一嘜熱辣辣嘅牛肉尤魚豬肉乾飯食喇！間唔中食吓，好過癮架！仲有整蛋糕，將一包麥維他，一包威化餅，加一包奶，然後搓成膠狀，倒入兜度，又放人滾水桶度浸，浸三次，就會變成蛋糕喇！再整溶啲朱古力唧上面，再整碎啲花生鋪上蛋糕面，就會變成一個美味蛋糕喇！係咪好有創意呢^v^

我哋喱度分低、中、高級組架！低級組又分二、四、五、六組，二組做圖書釘裝，即改裝硬度，然後送去公共圖書館。四、五、六組就車衣、車醫院病人格仔褲。七組就車Police衫，我以前响七組都車過Police，呢！Police衫心口塊牌就係我車架喇！分part車，我負責車Police喱塊牌，七組係中級組。

高級組分一、三、八組。我而家响一組，亦係精英組。我喱度係數碼圖像設計工場，專做政府啲宣傳Banner，同埋Backdrop，例如工展會，賣物會等等啲Backdrop都係我哋設計嘅！咁三組就做包裝，八組就做車高官啲衫褲囉！我識裁衫，又識車，第時可以做衫比妳哋著>v<

文：小魚兒